يامن اغتر في دنياه عندي سؤال للشاعر علي الزين
يامن اغتر في دنياه عندي سؤال
كم سألته لنفسي قبل اردّه إليك
كيف تغتر في شي مرجعه للزوال
ويش هذي الحماقه والغباء اللي فيك
مالدنياك هذي حال إلّا ومال
لاتفكر بأنك رب ما له شريك
الحياه حالها ميّال مثل الظِّلال
ذي هو اليوم لك باياخذه ذي يليك
مايدوم اي حال، الأمر هذا محال
يوم لك في الحياه ويوم ثاني عليك
وان فرضنا بأنك رب سلطه ومال
أو ورثت الغِنَى عن جدك وعن أبيك
لاتخلي غناك يدهدك للضَّلال
أو تشوف انك أعلى من مكانة أخيك
ياأخي كل مؤذي في حياته مُزال
والغِنَى لو طغى يعني زواله وشيك
لاتغرك حيـاة النغـنغه والدلال
كان دامت لغيرك ماغدت في يديك
والمثل قال حكمه فاستمع ويش قال
(من قنع في حياته عاش فيها مليك)
أطيب العيش عيش الإكتفا بالحلال
والرضا والقناعه كنز حاضر و(شيك)
إن رأيت ان غيرك عايش بحال عال
وانت في حال معدم والضَّنَك يعتريك
لاتضيع حياتك في أماني الخيال
أشكر الله واقنع بالذي هو لديك
وان تردّت فقابلها بصبر الجِمال
وارفع الراس امام الناس خليك (بيك)
لاتبيح الكرامه لجل كسب الريال
أو تبيع المبادئ للذي يشتريك
وانّك بحال زين وغيرك بشرّ حال
فاحمد الله ذي عن حالهم مجتبيك
لاتعايب وتشمت تبتلي بخس فال
بل قل الله يشفيهم ولايبتليك
شعر/علي الزين
تعليقات
إرسال تعليق