يدور الوقت للشاعر علي الزين
يدور الوقت يادنيا بدورات الأمل والياس
وتتغير حياة الناس موذيها وصالحها
تتغير حياة الكل حسب الوزن والمقياس
كما تتغير الأحوال غاديها ورايحها
وهذا شي طبيعي ماعلى حد به عتب أوباس
عتابي للقلوب اللي تخلت عن مطارحها
قلوب اشخاص كانو يرفعونا فوق هام الراس
وكنا ساكنين قلوبهم داخل جوانحها
جفونا للأسف من بعد طول الأنس والإيناس
وطاحت أقنعة من بالخداع اخفت فضايحها
جفونا يوم عشقتهم غشاها الشك والوسواس
وشانت بعدما زانت لنا وبانت قبايحها
وهذا هو السبب ذي هيج الهاجوس والهوجاس
وخلاني نظمت ابيات من صافي قرايحها
نظمت ابيات افضفض عبرها عن ضيقة الأنفاس
واترجم لوعتي اللي عشت اماسيها واصابحها
وكيف تريدني ياعاذلي اصبر واداري الراس
واخبي في حشاي اسرار صار الوقت فاضحها
كيف اصبر على قهر وغثا ماله شبه وقياس
وحسره أعجزت في الوصف واصفها وشارحها
كيف اصبر على من بعد عشرة عمر ماتنقاس
أطاعو في جفاي اهل المواشاة ونصايحها
كيف اصبر وهم بالبخس باعوني برخص افلاس
وعافو عشرتي وذمو محاسنها وملايحها
ومن بعد الموده والكلام الناعم الحساس
هجتني السنتهم ذي كم اهدت لي مدايحها
وبيديهم سقوني المر من بعد العسل في الكاس
وصابوني بطلقه في الحشا مكتوم قارحها
وحطو في طريقي للاسف وسط التراب امواس
وانا بالجهل رجلي داست الحد اللي جارحها
انا ماكنت اظن بيوم تتقلب قلوب الناس
وتتغير على غفله وتتبدل ملامحها
وتتحول إلى أحجار تفقد نشوة الإحساس
ولا تشعر بشي خالص سوى نزوة مصالحها
ابد ماكنت اتخيل بأن اهل الوفا تنداس
تحت اقدام من بالمصلحه تجني مرابحها
ولا في يوم كنت اتصور ان الحب ماله ساس
عند اهل القلوب اللي بتتعدد شرايحها
تخلو للأسف عني ودقو للفراق اجراس
وهم ذي لم تكن رغباتهم تكبح جوامحها
تخلو عن هواي وخالفو الميثاق والنوماس
وحادو عن مبادي الحب اخلو في لوايحها
تخلو بعدما خلو فؤادي بحبهم محتاس
وخانو بعدما كانو منا روحي ومطامحها
ألا ياغبن قلبي غبن تاجر صابه الإفلاس
غبني غبن عاطش يستقي من كاس مالحها
سقتني هذه الدنيا الشقا مسكوب وسط اكواس
سقتني المر والغسلين غاديها ورايحها
سقتني البهدله كانت تصب الكاس تلو الكاس
وتسقيني وانا من طيبتي أشرب واصافحها
ثلاث سنين تسقيني وتشقيني مسا واغلاس
وتضحك من معاناتي كأني الا امازحها
ثلاث سنين محسوبه ومكتوبه وسط قرطاس
ثلاث سنين مارقت ولا اهتزت جوارحها
وفي الآخر رمتني للأسف رميه بغير اقواس
وشقت في حشاي جروح اعيت من يجارحها
رمتني دون رحمه بسهمها ذي يزهق الأنفاس
على يدين اعز الناس الله لايسامحها
لكني انا الغلطان من راسي لحد الساس
انا الغلطان انا سلمت روحي ليد ذابحها
انا الغلطان يوم اني ادرت الظهر إلى جساس
انا الغلطان ذي حبيت ناس تحب صالحها
انا الغلطان واستاهل فقد فرطت في الألماس
وخذت الفالصو وخسرت صفقه كنت رابحها
شعر/علي الزين
.
تعليقات
إرسال تعليق