الأيام كده كده هتعدي -بقلمي الشاعرة زينب شبل
الأيام كده كده هتعدي
يبقى نعيشها ويكفي نقول
بينا وبين اليأس تحدي
واللي بيصبر بُكره ينول
عارفه يا قلبي صبرت كتير
ومن الدنيا ما دُقت حنان
وإنك عِشت العمر أسير
وإن ما نابك غير حرمان
مش هيفيدك دمع عنيك
مش هينوبك
غير هلاقيك
دبلان يوم عن يوم على عودك
امسح دمعك واللي عليك
تسعد كل الناس ب وجودك
أنسى الدنيا بكل حيرتها
والحق حظك م الأيام
وادعي أنا وأنت ندوق حلاوتها
بس الدمعة إن جيبت سيرتها
ح تدخلني معاك ف خصام
وإحنا قمرنا أهو لف وجالنا ف برج الحوت
والشمس اللي بتحيي أمالنا
هتنور و نكيد عُزالنا بعلو الصوت
_________
بقلمي الشاعرة زينب شبل
٢٠/٢/٢٠٢١
تعليقات
إرسال تعليق