سايبنا لمين ورايح فين / وائل سعيد
سايبنا لمين ورايح فين
اعيشها معاك على الحلوة
والمرة ندوق بعدين
واغني معاك انا الغنوة
ولو ناحت هنبقى اتنين
واصحى معاك من النجمة
لو كان مشوارك ف الصين
نجيب اللقمة والهدمة
ولو نشفت نقول بعدين
نكلها بعيش معاه كبده
وم الكفته يادوب صابعين
ولو قلت في يوم دقه
نكمل لطم ع الخدين
ماني صابرة عشان بكرة
ميراث الحته والقيراطين
وجودي معاك دا كان غلطة
وضغط وزن م الوالدين
كلام الحب والعشة
قصر يضم ف الحبيبين
معدش يجيب ولا وقه
وشوف الدنيا رايحة لفين
زميلتي وجوزها في الرقه
ملاك في الجنه له جناحين
لهم خدام وكام شقة
وعربية يسوقها اتنين
حساب في البنك والبورصة
ومصيف جنة ف العلمين
زميلتي التانية ف النمسا
وليها في فايد فدادين
كفاية ولا اكمل القصة
ملك ساكت مع الساكتين
ماهو لازم تشوف صرفة
نقب ونطلع مع الطالعين
كلامي صيحيح ملان غلظة
هترجع تانى تقول في الدين
وزهد نبينا في الدنيا
وتركه م الدهب جبلين
وصبر ستنا فاطمة
لحد ما كلت اليدين
مالك ساكت يادي الحسرة
مبرق جفن ويا العين
مفيش كلمة مفيش حركة
سايبنا لمين ورايح فين
دانا من غيرك اعيش أزمة
ولا تنام لي ف الليالى عين
واخاف من نسمة هوا طايرة
تهز شعرة للولدين
خلاص توبة آخر مرة
أنا راضية نكون حبيبين
ارجع وكن لي حيطة مايلة
ورزق الواحد يكفى اثنين
وان ضاقت هكون صابرة
واكلها بدقه مع الرغيفين
مالك ساكت يادى الحسرة
مبرق جفن ويا العين
مفيش كلمة مفيش حركة
سايبنا لمين ورايح فين
.........وائل سعيد.......
تعليقات
إرسال تعليق