نصاب / محمد الشبراوي

نصاب

نصاب بقلم وربابة
شاطر في رص الكلام والخطابة ..
يبيع ابوه عشان خاطر جنيه ..
وذمته وضميره والنبي والصحابة
تسمع كلامه يعجبك ..
وفي الحوار صوته عالي بالضلال يغلبك ..
قاموس اباحة ..
وبمنتهي صدق وصراحة ..
ع البجاحة انا باحسدك
موهوب في التهويل والتهوين والتلوين والتحويل ..
ساعات ماسك صاجات ..
وساعات دلالة ومعددة بمنديل ..
وساعات امام سابق الجميع في الصف
وتنزل دموعه في ساعة الترتيل ...
وساعات رقاصة في منتهي خفة ومياصة ..
وساعات منادي ينادي في الاموات ...
يصحي فينا السكات ...
وساعات زعيم منصور ..
وساعات مكسور ..
وساعات طرطور ..
وساعات وقور ...
واهو كله بالتسعيرة ...
الوش بيغش ...
ومن جوه عيره...
راجل منافق بألف وش ..
في الوش بش وهش...
وفي الخفي بيغش ..
راجل حلنجي العوبان ..
سليط اللسان...
اراجوز بهلوان ..
علي كل شكل ولون بيبان ..
تفطره يسبح بحمدك ..
تغديه ينفذ اوامرك ..
تنسي العشا .. ياغلبك ..
يهاجمك يعضك ...
ينهش في لحمك ..
يطلق سهامه ..
يوسخ كلامه ..
يقل احترامه ...
وده يبقي عادي ..
لما يوماتي يغير رفيق ..
ولما يعادي ...
عشان الابيج اغلي صديق ..
ولما يبيع ضميره ودينه ..
ويركن دماغه ويغمض في عينه ..
يصهين يماين وينصب كماين ..
ويشعلها حرب بينك وبينه ..
وده كله ليه ؟؟..
نافق وداهن ولا اختشى ..
اقولك ياصاحبي ..
اصلك ياصاحبي نسيت العشا ..

محمد الشبراوي